0901【上課時】
先生問捱有關節日个事情，
捱講：正月過年炊甜粄、發粄，
二月掛紙做紅粄、新丁粄，
五月節包粽子。
講忒哩，
先生對全班同學講捱：
恁會講，講到恁好。
捱聽著心肚盡歡喜。
0902【大家來掃地】
掃地唷！
捱兜凳仔，你掃地；
佢擦窗仔，排桌凳。
先生講：大家恁煞猛！
0903【食飯時間】
當晝頭，食飯時間一到，
捱等洗手，添飯又舀菜。
青菜、肉類樣樣食，
大家食到盡爽快。
0904【運動會】
鬧鬧熱熱運動會：
先生加油大聲喊，
家長拍手講恁會，
大家合作拚第一。
0905【同學校做生日】
大門前弓等七彩个雞頦仔，
黃色、青色、還有水紅色…
今晡日係學校做生日，
大家歡喜到奈毋得。
涼風陣陣吹過來，
快樂个歌曲聲聲唱，
笑弛弛仔企在大操場。
該片校長撮把戲，
這片先生來講古。
有猴精仔打觔斗，
又有嘴擘擘个大老虎。
歕笛仔，打鑼鼓，
大家共下來跳舞。
藝文活動還當多，
同學校做生日毋記得辛苦。