0301【永遠感謝你】

該日暗晡，大地牛轉身，

學校瞬間成廢墟，

係毋係做差吔麼个？

土地伯公樣無來保佑？

如今，有你等（兜）个幫忙，

校舍又重新蓋起。

還記得你个鼓勵；

毋使怨天怪地，

黑暗總會過去，

還記得你个付出，

捱等（兜）永遠感謝你！

0302【水源頭】

初秋个時節，家鄉大甲河脣；

白鶴花開淰淰，捱同細人仔伴在該拈石頭仔、

捉細魚仔同毛蟹，分吾个童年留下快樂个回憶。

大甲河个頂背，有一座水庫，

提供下背鄉親个用水，阿婆長透講：

「食水愛想水源頭，有好山正有好水。」

故所：大家愛注意水土保持，

恩兜个生活環境有保障。

原來學校先生講个「飲水思源」，

就係阿婆講个「食水愛想水源頭」。

0303【禍喙甕】

禍喙甕，喙禍禍，

肚嘓嘓，像佛仔，

有人講佢靚，有人講佢奀。

禍喙甕，年紀大，

毋驚風吹日頭晒，

恬恬跍到屋簷下，

係毋係在該想頭擺？